Euskaraz ikus-entzunezkoak sortzen aritzen diren gazteentzako lehiaketa berezi bat da, Euskaltzaleen Topaguneak antolatzen du 2004az geroztik. Euskal Herri osotik etorritako gazteak elkartzen dira Kameratoian, lehen aldiz horrelako rally batean parte hartzen dutenak eta jadanik zenbait urtez errepikatu duten beteranoak.

Euskal Zine Bileran 2017tik 

Kameratoia, zenbait urtetan, Euskal Herriko herri ezberdinetan ospatu izan da; 2013-2016 bitarteko edizioak Durangoko Azokaren baitan burutu ziren, ikus-entzunezkoen topalekuan, Irudienean.

2017an ospatu zenlehen aldiz Kameratoia  Euskal Zine Bileraren baitan, erabaki hori hartu zen euskarazko zinemaldian gazteei espazio propio bat zabaltzeko. Gazteen arteko harremanak estutzeko, beraien artean ere bildu daitezen, euskarazko zinemaldian.

Kameratoiaren ezaugarriak

Kameratoiko parte hartzaileek, 24 ordutan film bat grabatzeaz gain, aukera izango dute euskarazko zinemaldia barrutik bizitzeko, egun betez Lekeitioko kaleetan jarritako ezaugarriak betez egingo dituztelako lanak.

Hala nahi dutenek, Lekeitioko aterpetxean lo egiteko aukera izango dute, eta interneta duen gune bat izango dute erabilgarri.

Rallyaren hasiera orduan, parte hartzaile guztiei emango zaie eskura txosten bat: bertan azalduko dira film laburraren gaia eta filman agertu beharreko ezaugarriak. 24 orduren buruan euskarazko film laburra antolakuntzari entregatu beharko diote, oinarrietan agertzen den formatu eta moduetako batean.

Partehartzaile guztiei luntx bat eskainiko zaie eta, azkenik, sari banaketa ekitaldian erabakiko dute epaileek zeintzuk diren saridunak. 2600 euro daude jokoan, hiru saritan banatuta.

Kameratoia

Parte hartzaileen filmen zabalpena

Kameratoiaren beste helburuetako bat parte hartzaileen ekoizpen artistikoa gizarteratzea da. Horregatik,  lehiaketan sortutako pieza guztiak Creative Commons Aitortu–Partekatu lizentziapean zabaltzen dira. Gainera,  irabazlea Laburbira zirkuituan sartzeko sailkatzen da.  

Kameratoiak euskarazko ikus-entzunezkoen mundura sartzen laguntzen die gazteei. Euskaraz sortu, elkartu, komunikatu, konektatu, dibertitu, nahi duten gazte guztiek dute lehiaketan parte hartzeko aukera. Euskaltzaleen mugimenduak eta Euskal Zine Bilerak gogoz zabalduko dizkiete Kameratoiko ateak!